Aurtengoan ere liburu astearen baitan, 2. eskuko liburuen azoka egin dugu. Arrakastatsua izan zen azoka. Familia eta haur ugari elkartu ziren, kaxa artean gustoko liburuen bila. Azokarekin batera, ipuin kontalaria etorri zen HHra eta gustora egon ziren bertaratu zirenak Lur Kortaren ipuinak entzuten. 

Mila esker parte hartu duzuen guztioi! 

EHIGE eta BIDEZKO ELIKADURA-ren eskutik eskola-eremuko elikadura hobetzeko jarduera batzuk antolatu ditugu gure eskolan Hazi Bizi proiektuaren baitan. Hazi Bizi jangelaren kudeaketa eredua aldatzeko eta orokorrean gure eskolako elikaduraren inguruko lanketak egiteko asmoz sorturiko proiektua da. Urteak daramatzagu lanean EHIGE eta BIDEZKO ELIKADURA-ren laguntzarekin eta antolaturiko jarduera hauen helburu nagusia eskolako komunitatea sentsibilizatzea eta Hazi Biziko lan taldea indartzea izan da. 

Lehen ekintza otsailaren 2an antolatu genuen: Menu Perfektua izeneko Scape School-a eXperientziak taldearen eskutik. Menu perfektua ikasleek eta haien familiek eskola jantokiek duten garrantziaz eta hezkuntza integral, osasungarri eta kritiko batean duten eraginaz hausnartzeko ihes gela bat da. Abentura horretan, Txef Ozpina eta Txef Eztiaren gidaritzapean elikadurarekin lotutako enigma eta erronken bidez eskola jantokiaren funtzionaltasuna eta haren inguruko guztia aztertzen jardun zuten haur zein helduz osaturiko hainbat taldek. Modu ludiko eta oso dibertigarrian elikadura eta jantokien inguruko lanketa oso polita izan zen. Eskeinitako talde guzti-guztiak bete ziren eta arratsalde pasa polita egin genuen.

Ondoren, gurasoentzat elikadura eskolak antolatu genituen eta 4 saiotan banaturik ondorengo gai ezberdinak jorratzeko aukera izan genuen:

---

1. SAIOA: Nork erabakitzen du jaten duguna? (Otsailak 26)

---

Saio honek nekazaritzako elikagaien ekoizpenaren funtzionamendua argitzea izan du helburu, korporazio gutxi batzuk merkatuan nola nagusitzen diren aztertuz. Kontsumo-ohiturak egokitzeko moduari buruzko aholku praktikoak eman zizkiguten, gizartearen, ingurumenaren eta ekonomiaren ikuspegitik aukera iraunkorragoak ahalbidetzeko.

---

2. SAIOA: Nola jan dezakegu hobe? (Martxoak 4)

---

Nutrizioan oinarri bat eskaintzeaz gain, modulu hau familiak gomendio praktikoekin hornitzeko diseinatu da, haur eta gazteek elikadura-erregimen osasungarria har dezaten bermatuz.

---

3. SAIOA: Nola hobetu dezakegu jantokietako elikadura (Martxoak 11)

---

Parte-hartzaileek ikastetxeetako elikadura-ingurunea eraldatzeko estrategiak ezagutu zituzten, jantokiko menua hobetzetik ikasleen hamaiketakoetan eta askarietan aldaketa positiboak sartzeraino.

---

4. SAIOA: Platerak eta pantailak: elikadura eta sare sozialen erabilera konszienterako erabilerak (Martxoak 18)

---

Sare sozialetan eta eskola jantokian dauden estereotipoak identifik atzeko eta kontrajartzeko gakoak.

Talde handiegiak izan ez arren oso aktiboki parte hartu zuten partaideek eta elikadura eta jantokien egoeraren informazio interesgarria jasotzeaz gain, Hazi Bizi proiektuak etorkizuna baduen sentsazioarekin amaitu genituen saioak.

Hitzaldiak iraun bitartean haurrentzako txoko berezi bat antolatu zen, non Katiuska eta bere lagunek haurrekin gaiarekin loturiko ekintza ugari egin zituzten. Gainera, txori txiki batek esan digu haurrak oso gustora egon zirela Katiuskarekin eta batzuk errepikatzeko gogoz etortzen zirela aste batetik bestera.

Beraz, balorazio oso positiboa egiten dugu eta proiektuarekin jarraitzeko indar gehiagorekin sentitzen gara. Saioetara etortzeko aukerarik izan ez bazenuen, baina gure proiektuan interesa baduzu edo parte hartu nahi baduzu idatzi ondorengo emailera eta zurekin harremanetan jarriko gara.

e-maila: hazibizi@ni.eus

Mugikor eta ingurune digitalen inguruko 3 hitzaldi antolatu dira:

• Lekua: Etxezabalan, kale Nagusia 29
• Hizlaria: Esti Linares
• Ordutegia: 18:00 – 20:00

1. Saioa:

Mundu digitala: hipersexualitatea

• Apirilak 9, asteartea

---

2. Saioa:

Bidejokoak eta whatsapp: maskulinitatea jokoan?

• Apirilak 16, asteartea

---

3. Saioa:

Pornografia: guraso estrategiak

• Apirilak 23, asteartea

Hazi Bizitik 4 saiotako ekimen bat antolatu degu, “Familientzako Elikadura Eskola” deritzona. Hauen bitartez gure seme-alaben eta gure elikaduraren inguruko hausnarketa bultzatu nahi dugu, eta hobekuntzarako pausoak eman. Hona hemen lau saioen berri:

1. Saioa:

Nork erabakitzen du jaten deguna?

• Otsailak 26, astelehena
• 17:00 – 19:00
• Ikusi agenda

---

2. Saioa:

Nola jan dezakegu hobetoago?

• Martxoak 4 astelehena
• 17:00 – 19:00
• Ikusi agenda

---

3. Saioa:

Nola hobetu dezakegu jantokietako elikadura?

• Martxoak 11, astelehena
• 17:00 – 19:00
• Ikusi agenda

---

4. Saioa:

Platerak eta pantailak: elikadura eta sare sozialen erabilera konszienterako erabilerak

• Martxoak 18, astelehena
• 17:00 – 19:00
• Ikusi agenda

Aurten ere ederki pasa dugu eskulan eta gaileta tailerrean.

HH4tik LH2ra bitarteko haurrak eta guraso laguntzaileak eskolako jangelan lan eta lan jardun gara, gabon giroko apaingarriak eta gaileta goxoak egiten.

Mila esker parte hartzera animatu zareten guraso bolondres guztiei eta bereziki urtero urtero gailetak egiteko masa oparitzen digun Sayalero gozotegiari.

—

Hemen eskulanen tailerren argazki batzuk:

—

Hemen gaileta tailerraren argazki batzuk:

Aurten ere egin dugu 2. eskuko jostailuen azoka.

Eskerrik asko etxeko jostailuak ekarri dituzuenoi, azokara gerturatu zareten guztioi eta baita saldu ez diren jostailuak jaso dituen Zarauzko Gurutze Gorriari ere.

Jostailuak etxez aldatu eta erabiliak izaten jarraitzeko modua izateaz gain, Balurdin guraso elkartearen hurrengo ekintzetarako dirua bildu da.

Mila esker guztioi!

2023/06/04

Eskola amaierako jaia bikaina izan da!

Orokieta Herri Eskolan ikasturte amaierako jaiaz gozatzeko primerako aukera izan genuen. Alaitasunez eta kolorez jantzi genuen eskola. Peperen oroimenez egindako esku pilota txapelketako finala, dantzaldiak, tailerrak, ur jolasak eta abar luze batez eman genion hasiera festari. Bazkari eder batekin indarrak bereskuratu ondoren, arratsaldean musika eta festaz gozatzen jarraitzeko aukera izan genuen. Haur, gazte nahiz helduek ederki pasa genuen.

Eskerrik Balurdin Guraso Elkarteko partaide guztiei eta bolondres modura lanean aritu zareten denoi, zuek gabe festarik egongo ez zelako, eta, noski, bertaratu zineten eta Orokieta osatzen dugun komunitate osoari. Bejondeigula!

Testua: OROKIETA.

Martxoa eta apirilean “Hamaiketako osasungarri tailerrak” egin ditugu Hazi Bizi proiektuaren baitan. Proiektu honek Orokietako jangelako kudeaketa eredua aldatzea du helburu nagusi eta kurtso honetan, Lakari kooperatibak gidatuta eta Urkomeren finantzaketa lagun, Balurdinek jangelaren kudeaketa aldatzeko prozesua gauzatzeko lanketa hasi du.

Lanketaren parte garrantzitsua da guretzat haur zein guraso elikadura osasuntsu baten garrantziaz sentsibilizatzea eta xede horrekin antolatu genituen tailer hauek. Hamaiketako edo meriendarako alternatiba goxo eta osasuntsuak egiten ikasi genuen bertako eta garaiko produktuak erabiliz. Bertaratutako haur eta gurasoek eskuak zikindu eta arratsalde interesgarri eta dibertigarri bat pasa genuen Orokietako jangelan. Errezeta ezberdin ugari prestatzeko aukera izan genuen eta amaieran errezeta guztiak dastatu genituen afari merienda batean. Bukatzeko, errezeta guztiak biltzen dituen liburuxka bana jaso zuten haurrek opari eta errezeta horiek bertaratu ez zineten guztiokin konpartitu nahi ditugu esteka honetan.

Tailerreko plaza guztiak bete ziren eta guraso asko animatu ziren haurrekin batera, beraz, janari osasuntsuak interesa sortzen duen sentsazioarekin geratu gara eta horrek asko pozten gaitu. Jarrai dezagun ba lanean!